मनोरन्जन

लोकमणि राई

काठमाडौं, फागुन २८ - 'हाम्रो होली ग्ल्यामरस मात्र छैन, रंगसँगै स्नेह साटासाट गर्छौं ।' साइबर संसारका निर्देशक अभिनव कसजुले यसो भनिरहँदा मंगलबार दिउँसो डिजे राजुको गीतमा करिब तीन दर्जन मोडल, गायक र कलाकार मच्चिइरहेका थिए । कतिपयका हातका बोतलमा बियर र कसैका गिलासमा वाइन छल्किरहेका थिए । राजधानीका चोक र गल्लीमा भइरहेका होली गतिविधिबारे बेखबरझैं उनीहरूबीच बेलाबेला रंग घसाघस र भागदौड पनि चलिरहेको थियो ।

झट्ट हेर्दा केही तलबितल पर्ला कि जस्तो देखिन्थ्यो तर अवसर होलीको थियो, भागदौडबीच रंग घसिए पनि सबैका अनुहार हँसिला थिए । साइबर संसारद्वारा आयोजित होली पार्टीमा जति रंग धसियो त्यति उन्मुक्त हाँसो सुनियो । मोडल बेबी थापा मोबाइलै अफ गरेर मस्ती लिइरहेकी थिइन् । 'रंगले एलर्जी हुने' उनको अनुहारमा रंगाउन बाँकी ठाउँ थिएन । उनी बेलाबेला बियरको चुस्की लिइरहेकी थिइन् ।

एलर्जीले बिगार्ला नि अनुहार ? 'वर्षमा एकपटक न हो होलीको रमाइलो गर्ने ?,' उनले भनिन्, 'चिनेका सबै साथीभाइ आउने भएकाले म पनि यहाँ छु ।' हास्य कलाकार निर्मल शर्माका अनुसार राजधानीको होली परम्परागत शैली त्यागी पार्टी संस्कृतिमा रूपान्तरण भएको करिब एक दशक मात्र भएको छ । 'तराईमा जस्तो नयाँ सेतो कपडा लगाएर चौरमा भेला भई रंग छ्यापाछ्याप गर्दै होली मनाएको काठमान्डुमा देखिँदैन,' उनले भने ।

तराईमा जस्तो नदेखिए पनि आपसी सद्भाव र माया बढाउन खेलिने रंग पर्वको यो मौकालाई मोडल र कलाकारहरूले त्यत्तिकै उम्काउन नचाहेको चाहिँ देखिइरहेको थियो । पार्टी संस्कृतिले होलीमा हुन सक्ने लडाइँझगडालगायतका विकृतिलाई टार्ने गरेको निर्मलले बताए । 'बाहिर फोहर पानी, हानिकारक रसायन र रंग प्रयोग हुन्छ,' उनले भने, 'यहाँ त्यस्तो नभएकाले स्वास्थ्यमा असर पर्ला भन्ने चिन्ता छैन ।'

मोडल बेबीलाई यही कुराले एलर्जीको चिन्ता नदिलाएको हुन सक्छ । 'वर्षभरिको कामको थकान मात्र होइन,' अभिनवले सुनाए, 'रिस, राग र द्वेष मेटाउन पनि हामी प्रत्येक वर्ष यसैगरी होली खेल्छौं ।'