व्यापार सन्धिमात्र हुने

लोकमणि राई

काठमाडौं, प्रधानमन्त्री माधवकुमार नेपालको भारत भ्रमणमा वाणिज्य सन्धिमा मात्र हस्ताक्षर हुने भएको छ । साथै दीर्घकालीन र अल्पकालीन करिब दर्जन एजेन्डामा छलफल र सैद्धान्तिक सहमति हुनेछ ।

मन्त्रिपरिषदको सोमबारको बैठकले भ्रमण सद्भाव र आपसी विश्वास अभिवृद्धिमा केन्दि्रत हुने निर्णय गरेको छ । प्रधानमन्त्री नेपाल ६४ सदस्यीय प्रतिनिधिमण्डलको नेतृत्व गर्दै मंगलबार नयाँदिल्ली प्रस्थान गर्दैछन् ।

सरकारका प्रवक्ता सूचना तथा सञ्चारमन्त्री शंकर पोखरेलका अनुसार सद्भावना भ्रमण एकै विषयमा मात्र केन्दि्रत हुने छ्रैन । जलस्रोतको विकास, सीमा व्यवस्थापन र आपसी हितका अन्य विषयमा समेत नेपालले भारतीय समकक्षीसँग कुराकानी गर्ने जानकारी उनले दिए ।

सद्भावना भ्रमण भएकाले द्विपक्षीय हितका विविध विषयमा छलफल हुने उनले बताए । पञ्चेश्वर परियोजना भ्रमणको मुख्य उद्देश्य भने नभएको उल्लेख गर्दै उनले व्यापार तथा पारवहन सन्धिमा हस्ताक्षर हुने जानकारी दिए ।

'मूलतः यो सद्भावना भ्रमण हो,' प्रधानमन्त्री स्रोतले कान्तिपुरसँग भन्यो, 'संविधान निर्माण र शान्ति प्रक्रियामा भारतीय थप सद्भाव यो सरकारलाई प्राप्त हुनेछ ।'

मन्त्रिपरिषद बैठकले भ्रमणदलका सहभागीको नामावली अनुमोदन गरेको छ । भ्रमण दलमा प्रधानमन्त्री पत्नी, ४ सल्लाहकार, दुई सुरक्षा अधिकारी, ६ मन्त्री, ६ सभासद, ६ व्यापारी, १८ पत्रकार र उच्च सरकारी अधिकारी छन् ।

स्रोतअनुसार भ्रमणमा प्रधानमन्त्रीका प्राथमिकतामा प्रसारण लाइन, हुलाकी राजमार्ग, नौमुरे जलविद्युत् परियोजना, पञ्चेश्वर बहुउद्देश्यीय परियोजना, विकास निर्माणलगायत छन् । त्यसैगरी वाग्मती संरक्षण तथा व्यवस्थापन, संग्रहालय निर्माण, छात्रवृत्तिमा भारतले उल्लेखनीय सहयोग गर्ने निश्चित भएको छ ।

'नेपालको तर्फबाट 'सपिङ लिस्ट' तयार पारिएको छैन,' स्रोतले भन्यो, 'सानातिना आर्थिक सहयोगभन्दा दीर्घकालीन महत्त्वका परियोजनामा जोड दिने नेपालको नीति रहनेछ ।'

व्यस्त भेट

नयाँदिल्ली -कास)- प्रधानमन्त्री माधवकुमार नेपाल मंगलबार सुरु हुने पाँचदिने भारत भ्रमण क्रममा उच्च राजनीतिक तथा व्यापारिक भेटघाट र नागरिक समाजसँगको अन्तक्रिर्यामा व्यस्त हुने भएका छन् ।

नयाँदिल्लीस्थित इन्दिरा गान्धी अन्तर्राष्ट्रिय विमानस्थलमा दिउँसो २ बजे ओर्लने नेपालले २० किलोमिटर पर सहरको केन्द्रमा रहेको ओवराय होटलमा भारतको माथिल्लो सदनका विपक्षी दलका नेता अरुण जेट्लीलाई भेट्ने छन् । त्यसपछि उनीसँग भारतीय विदेश सचिव निरूपमा रावले शिष्टाचार भेट गर्नेछिन् । साँझ प्रधानमन्त्रीसँग नेसनलिस्ट कंग्रेस पार्टीका नेता डीपी त्रिपाठीसहितको एउटा टोलीले भेटेपछि वरिष्ठ कम्युनिस्ट नेता एबी बर्द्धनले छुट्टै भेट्ने छन् । राति ८ बजे प्रधानमन्त्री नेपाल आफू बस्ने होटल ओवरोयभन्दा केही किलोमिटर परको नेपाली दूतावासमा पुगेर भारतका नेपाली समुदायसँग अन्तक्रिर्या गर्ने नेपाली दूतावासले जनाएको छ ।

बिहानै महात्मा गान्धीको समाधिस्थल राजघाट पुगेर प्रधानमन्त्री नेपालले भ्रमणको दोस्रो दिनको सुरुवात गर्नेछन् । भारतीय प्रधानमन्त्रीले साँझ नेपाली पाहुनाको सम्मानमा भोज दिनेछन् ।

भोजअघि साढे ६ बजे प्रधानमन्त्री नेपालले यहाँस्थित हैदरावाद हाउसमा प्रधानमन्त्री सिंहसँग औपचारिक वार्ता गर्नेछन् । वार्ताअघि नेपालले सत्तारूढ गठबन्धनकी अध्यक्ष सोनिया गान्धीलाई उनकै निवासमा गएर भेट्ने कार्यक्रम छ ।

राजघाटबाट फर्केपछि नेपाललाई होटलमा माक्र्सवादी कम्युनिस्ट नेता सीताराम यचुरी र विदेशमन्त्री एमएम कृष्णाले छुट्टाछुट्टै भेट्ने छन् । दिउँसो १२ बजे प्रधानमन्त्री नेपाल राष्ट्रपति प्रतिभा पाटिललाई भेट्न राष्ट्रपति निवास जानेछन् ।

त्यसपछि होटल फर्केर व्यापारिक समुदायसँग दिवा भोजमा सामेल हुनेछन् । अनि उपराष्ट्रपति हमिद अन्सारीलाई भेट्न जाने छन् ।

भ्रमणको तेस्रो दिन बिहीबार उनले केही भारतीय सम्पादक र नागरिक समाजका वरिष्ठ सदस्यहरूलाई भेट्ने छन् भने त्यसपछि अर्थमन्त्री प्रणव मुखर्जी र गृहमन्त्री पी चिदाम्बरमसँग छुट्टाछुट्टै भेट्ने छन् ।

त्यही दिन उनलाई पूर्वप्रधानमन्त्री आईके गुजरालले भेट्ने छन् । त्यही दिन दिउँसो भारत र नेपाल संसदीय मित्रता मञ्च र जनता दलका नेता शरद यादवसँग भेट्ने छन् । साँझ उनले देवव्रत विश्वासलाई भेट्ने छन् भने साढे ५ बजे इन्डिया इन्टरनेसनल सेन्टरमा नेपाल र भारत सम्बन्धबारे सम्बोधन गर्नेछन् ।

Posted on: 2009-08-17 22:13:11